Pontevedra respira aire tóxico polos elevados índices de mercurio procedentes da planta química que Elnosa ten en Lourizán. Así o advirte o informe Inmisións de mercurio da industria clorocaústica 2006-2010 elaborado por Ecologistas en Acción, no que se advirte que as oito plantas existentes no Estado superan con creces os niveis de contaminación por mercurio que marca a Organización Mundial da Saúde (OMS). O estudo enmárcase dentro da campaña Internacional Mercurio Cero, que posibilitou o peche da industria que utiliza este elemento en países como Chequia ou Francia.
O de Elnosa é, xunto coa planta de Flix (Tarragona), o caso máis preocupante, ó rexistrar índices sete veces superiores ó límite recomendado, que a OMS sitúa en 200 nanogramos por metro cúbico de aire. Fronte a isto, as medicións realizadas este verán por Ecologistas en Acción na contorna da fábrica rebelan que os valores máximos chegaron a ser de case 900 nanogramos pola mañá e de 1.408 pola tarde, se ben a media foi de corenta nanogramos aproximadamente.
O preocupante, para Ecologistas en Acción, é que este índice de contaminación por mercurio se rexistra en hortas próximas á planta de Lourizán, o que indica que a industria do cloro emite “moito máis mercurio do que declara oficialmente” e que os seus efectos nocivos poden chegar ata os cidadáns a través das propias hortalizas que cultivan, segundo sinala a responsable do informe, Leticia Baselga.
A Asociación pola Defensa da Ría de Pontevedra (APdR), que colaborou con Ecologistas en Acción na toma de mostras para o estudo, xa anunciou que lle pedirá ó fiscal de Medio Ambiente de Galicia que “actúe de oficio” contra a fábrica de cloro. Ademais, ambos os dous colectivos ecoloxistas poñeranse en contacto coa Xunta para esixirlle que non renove a autorización ambiental integrada a Elnosa no ano 2011 e advertiron que se Elnosa non é capaz de adaptarse ás recomendacións dos organismos internacionais “debe pechar definitivamente” as súas portas.
Ya, en Haití no tienen problemas de contaminación por mercurio. Deberíamos tomar nota de su modelo productivo.